“Gülsək üzü göylərə” təqdim olundu

Mayın 2-də “Litera” kitab evində şair, yazıçı və tərcüməçi Zahid Sarıtorpağın MİMTA Yayımları tərəfindən nəşr olunan “Gülsək üzü göylərə” şeirlər kitabının təqdimat mərasimi keçirilib.

YAZİCİ.AZ xəbər verir ki, təqdimat mərasimi Sərxan Rüstəmovun moderatorluğu ilə baş tutub.

Təqdimatda çıxış edən araşdırmaçı-yazar Muxtar Cəfərli meəllifin şeirlərindəki fəlsəfi-irfani dərinliyə toxunub, üslubunun özünəməxsusluğu ilə bağlı fikirlərini bölüşüb.

Müəllifin qələm dostları – yazıçı Həcər Paşayeva, gənc şair Mir Kamil, Elçin Məmmədov, Ayaz Arabaçı, İlham Zeynallı, İqbal Həsənzadə və başqaları kitab haqqında fikirlərini bölüşüb, Zahid Sarıtorpağın yaradıcılığından nümunələr səsləndiriblər.

Sonda müəllif oxucular üçün kitablar imzalayıb. 

Kitabdan bir şeir oxuculara təqdim edirik.

* * * 

yüyürmədik yıxılaq, yıxılmadıq dikələk

hər gözün çanağında bir ümid güllər dedik

zaman ölmüş bir atdı yalını öpür külək

gözünü göy üzünə nahaqdan zillər dedik

bilirdik buralartək oralar da boş olur

hamının yazısında bir dərviş var bir də yol

bir də bizə tuşlanan o sirri-xuda barmaq

dəli şeytan deməz ki yum gözünü rahat ol

onsuz da gözümüzə tökülən qara torpaq

dirilərin əlində təmasdan sərxoş olur

adamın göy üzündə çat verincə aynası

hər çatından bir surət düşüb yerə sərilər

əlifban faş olunca oxunan kimi yazın 

adını ölü qoyur yanındakı dirilər

adam bilmir o zaman niyə dönüb daş olur

arınıb bu dünyadan pak olmaq istəyirik 

amma nə göz çeşmədi nə də ovuclar ləyən

biz hər yaxşıya yaxşı hər pisə pis deyirik

gözümüzdən gəlirsə dilimizdən gəlməyən

demək belə çıxır ki haqq nahaqqa nuş olur

bu dolaşıq kəlamlar batırmaz bizi yasa

gülsək üzü göylərə süzər orda yüz pəri

bütün fəsillər boyu əllər uzanar yaza

yazın yaxasındasa hər gül – bir güllə yeri

ya qış keçir yaz gəlir, ya yaz dönüb qış olur…

16.12.91