Sevincə boyanan naxışların var - Şeirlər

Yazıçı Ədəbiyyat Portalı Cavid Musanın şeirlərini təqdim edir.

XXX

Mənim kəlimələrim dilimdə deyil, 

çiynimdə yükdür.

Gözlərim kədərlərin soyuğundan,

içimə boylanır, bir biçim od axtarır isinmək üçün.

Qəlbimdən qopur millətimin min illik səsi,

çırpılır cahanın divarlarına.

Qələmim mənim əvəzimdə Allaha dua edir.

Öyrətdiklərini nə zaman anlayacaq ki, artıq öyrənir.

Yaşadım dünyanın hər çətinliyin.

Bilmədim heç kədərdimi, sevincdimi?

Soruş qələm, soruş.!

Tanrı məndən incidimi?!

Allah, Allah dünyanın işinə bir bax,

özüm gedə bilmədiyim yerlərə, gah,

Yazdığım sözlər, cümlələr gedir.

Mən hələ bilmirəm mənə nələr verilir?

Mən bilirəm məndən nələr gedir!

XXX

Su ömrün neçə dağ, silsilə aşdı

Sözlərin lal oldu, dilin dolaşdı

Yaşını soruşdum – gözün danışdı

İlləri gizlədən baxışların var.

Adım yurd salmışdı dodaqlarında

İndi dərdlərin gəzir ayaqlarında

Bir vaxt qəmzə batan yanaqlarında

Həsrətdən yol çəkən qırışların var.

Susqunluq içində yaşatdın yarı

Bir də göz açdın ki, ömürün yarı!

Kirpikdən asılan buz qırıqları

Ürəkdən tökülən yağışların var.

Buzların əriyər qarlı bağında

Ümid çiçək açar qüssə çağında

Gözlərin parıldar sabahlarında

Sevincə boyanan naxışların var.

XXX

İçimdə o qədər arzular gəzir.

Həqiqi dünyanın həsrətindədir.

Doğuşdan məhkumdur qaranlıqlara.

Çırpındı içimdə Azadlıq dedi.

Onu eşitdimi görən dünyalar?

Dünyanın içində yaşasam da mən,

İçimdə yaşayan başqa dünya var.

Sükutla danışan gizli bir Vətən!

Mənim arzularım daşdan yaranıb

Nə fırtına gücünə qovulub gedir.

Nə göz yaşlarına ovulub, gedir.

Evlənir arzularım bir – biri ilə

İlahi, nə gözəl arzular doğur.

Elə ki yetişir öz vüsalına

Azadlıq sevinci onları boğur.