Bəxtsiz qoz - Coşqun Xəliloğlunun qısa təmsilləri

Yazıçı Ədəbiyyat Portalı Coşqun Xəliloğlunun qısa təmsillərini təqdim edir.

İXTİSAR

Sintezator çıxandan

Düşdü tar ixtisara,

Kamança çalınmadı,

Qaval qaldı avara.

GİTARA YAZISI

Gitara çap etdirdi,

Qəzetdə belə yazı:

-Qocalıb, əldən düşüb,

Çalmaq günahdı, Sazı.

MİKRAFON

Natiqi danışdıran,

-Mikrafon dedi, - mənəm.

O, ağzın açır-yumur,

Yorulur mənim çənəm.

BƏXTSİZ QOZ

Müğənni söz açırdı,

Tərifindən badamın.

Qoz dedi: - Xoş taleyi,

Bəxti ola adamın.

ŞAMAMA ƏRİZƏSİ

Şamama ərizə yazdı: 

-Yaman şişibdir Qovun,

Xahişimiz budur ki,

Onu bostandan qovun.

LƏKDƏN ÇIXAN ÇİYƏLƏK 

Tərəvəzlər birləşib

Yazdılar Çiyələkdən:

-Artıq bizi bəyənmir,

Çalışır çıxsın ləkdən.

SARMAŞIQ

Sarılıb gül-çiçəyə,

Keflə yaşar Sarmaşıq.

Amma döşünə döyər:

-Mənəm bağa yaraşıq.

SOVKAQURDU GİLEYİ

-Pambıq yaman azalıb,

Çətindir eyləmək tab,

Bəs bizdən niyə yazmır,

Görən “Qırmızı kitab”.

HAQSIZLIQ

Yarpız dedi: - Haqsızlıq

Öldürəcəkdir məni.

İnsanlar niyə məndən

Çox sevirlər nanəni.

HÖRÜMÇƏK İRADI

-Bilin, Baramaqurdu

Toxuya bilmir ipək,

Bu işin içrasını

Özüm aparım gərək.

MİLÇƏK XƏBƏRDAĞRLIĞI

Kürsüdən çıxış edib 

Belə söylədi, Milçək:

İnsanlar, ayıq olun,

Ziyankardı hörümçək.

SOĞANIN İRADI

Soğan: - İylidir,

Öddür, sarımsaq.

Niyə yaşayır,

Görən bu sarsaq.

BİRİNCİ ÇÖRƏK

Kartof dedi, “Gəliblər

İnsanlar mənə kələk,

Buğda məndən sonradır,

Mənəm “Birinci çörək”

BOZBAŞ TƏNQİDİ

Bozbaş tənqid edirdi

Yığıncaqda Salatı:

-Süfrəmizə yaraşmır,

Şübhəlidir həyatı.

1996- 2000-ci il