Reinkarnasiya - Mehman Qaraxanoğlu

Yazıçı Ədəbiyyat Portalı Mehman Qaraxanoğlunun yeni şeirlərini təqdim edir.

REİNKARNASİYA

Bolşevik-kommunust təfəkküründən

Bir millimetr də aralanmayan

Yekə-yekə kişilər

Əzilə-büzülə,

Şizofrenik əda ilə,

Dodaqlarını büzə-büzə 

Guya sevgi şeirləri oxuyurlar...

Şeirlərində sevgi-zad yoxdur -

Sönüb kül olmuş ehtiraslarına ağı deyirlər sanki...

Arxetipik-seksual zədələr

Gec sağalır, qardaşım...

Onlar Rəsulzadəyə it, şarlatan, millət xaini deyən 

O şairə deyil,

Onun yaşadığı “sevimli” epoxaya bəraət qazandırırlar...

Çünki o “bəraət”də həm özləri,

Həm də yaşadıqları “sevgili” XXI əsr vardır;

Ata-babaları,

Dədələri,

Nənələri vardır!

Və özlərinə də əl yeri saxlayırlar ki, 

Bəd ayaqda

Bütün zamanlardan

Sağ-salamat çıxara biləsinlər 

O şairin ruhuyla

Reinkarnasiyaya uğramış ruhlarını...

EPİDEMİYA

Elmi populyarlaşdırmaq üçün

Yığışın,

Toplaşın hər gün,

Yığncaq edin,

İclas çağırın!

Məndən də yaxşı bilirsiniz;

Elmi populyarlaşdırmaq üçün

Daha çox dedi-qodu,

Daha çox qalmaqal,

Daha çox saçyoldu

Gərəkdir sizə.

Onunçün də tezbazar

Dildən pərgar,

İstedaddan kasad, 

Ortabab, 

Fəqət ambisiyalı xanımları

Yığın elmə...

Onda siz də populyarlaşarsınız!!!

Elmi populyarlaşdırmağın bir yolu da vardır, cənablar

Bütün istedadları çərlədin,

Şərlədin, 

Rədd edin elmdən!

Yığın başınıza 

Ona, buna “dissertasiya” yazdıran

Pullu şərəfsizləri. 

Anasını kərbalayı ismayıllara siğə elətdirib

Populyar bəy olanları;

Plagiatçıları,

Aktivistləri,

Şoumenləri,

Üzə duranları,

Dələduzları...

   İyun. 2026