Bəxtiyar Vahabzadə: Bayraq - "Əlyazma" rubrikası..

Yazıçı Ədəbiyyat Portalı Tural Adışirinin təqdimatında "Əlyazma" rubrikasında Xalq şairi Bəxtiyar Vahabzadənin "Bayraq" şeirini təqdim edir.

Torpağım üstünə kölgələr salan 
Mənim varlığımın cilası – bayraq. 
Zəfərdən doğulmuş, Göytürkdən qalan 
Qurdbaşlı bayrağın balası bayraq.  

Üçrəngli bayrağın kölgəsində mən 
Qaraca torpağı vətən görmüşəm. 
Zəfər güllərini dövri-qədimdən 
Bayraq işığında bitən görmüşəm.

Bayraq - öz yurduma öz hakimliyim. 

Bayraq - Azadlığım, bayraq kimliyim.

Tarixdən qədimdir, zamandan qoca 
Mənim bayrağıma sancılan hilal. 
Aləmə nur saçdı tarix boyunca 
Məbədlər başıma tac olan hilal. 

Daim ucalasan! Savaş günündə 
Əsgər silahıyla səni tən görüm. 
Yalnız zəfər çalmış şəhid önündə 
Səni alqış üçün əyilən görüm.

Harda əcdadımın ayaq izi var, 
Bu zəfər bayrağım orda dikəlsin. 
Keçdiyi yerlərdə dağlar, yamaclar 
Onun hüzuruna salama gəlsin.