Müəllimin ömrü təqvimlə deyil, yetişdirdiyi insanlarla ölçülür

Həyatda elə peşələr var ki, onlar yalnız əmək fəaliyyəti deyil, bir ömrün mənası, bir insanın taleyi və missiyasıdır. Müəllimlik məhz belə peşələrdəndir.

Müəllim olmaq dərs deməkdən daha böyük məfhumdur. Müəllim olmaq gələcəyi qurmaq, insan yetişdirmək, qəlblərə işıq salmaq, cəmiyyətə mənəvi sərvət bəxş etmək deməkdir.

Mənim həyat yolumun ən böyük mənası da məhz bu müqəddəs missiyada gizlənir. İllər əvvəl qədəm qoyduğum məktəb həyatı zaman keçdikcə mənim üçün sadəcə iş yerinə deyil, həyatımın ayrılmaz parçasına çevrildi. Hər səhər məktəbə daxil olarkən özümü bir təhsil ocağında deyil, böyük bir ailənin içində hiss etdim. Bu ailənin ən qiymətli üzvləri isə şagirdlərim oldu.

Mən onları heç vaxt yalnız şagird kimi görmədim. Hər birinin sevincinə sevindim, uğuruna qürurlandım, kədərinə kövrəldim. Onların ilk nailiyyətləri, ilk uğurları, ilk arzuları mənim üçün doğma övlad sevincindən fərqlənmədi. Çünki müəllimlik yalnız bilik vermək deyil, eyni zamanda sevgini, mərhəməti, dürüstlüyü və vətənə bağlılığı öyrətməkdir.

İllər bir-birini əvəz etdi. Nəsillər dəyişdi. Məktəbin qapısından minlərlə gənc keçərək həyata qədəm qoydu. Bu gün onların arasında müəllimlər, həkimlər, mühəndislər, alimlər, dövlət qulluqçuları, hərbçilər və müxtəlif peşə sahibləri var. Hər dəfə onların uğurları haqqında eşidəndə qəlbimdə izaholunmaz bir sevinc yaranır. Çünki müəllimin zəhmətinin bəhrəsi məhz yetişdirdiyi insanlarda görünür.

Müəllim ömrünün gözəlliyi də bundadır. O, öz uğurunu şəxsi nailiyyətlərində deyil, şagirdlərinin qazandığı uğurlarda görür. Bir müəllim üçün ən böyük mükafat illər sonra qarşısına çıxan bir şagirdin: “Müəllim, sizin öyrətdikləriniz həyatımda mənə yol göstərdi”, – deməsidir. Bu sözlər dünyanın bütün mükafatlarından daha qiymətlidir.

Bu gün geriyə boylananda keçdiyim yolda yorğunluqdan çox qürur görürəm. Çünki ömrümün ən gözəl illərini gələcəyimiz olan uşaqlara həsr etmişəm. Onların hər biri həyatımın bir parçası, yaddaşımın silinməz xatirəsi, qəlbimin ən dəyərli sərvətidir.

Mən inanıram ki, müəllimin əsl izi daşlarda deyil, insan qəlbində qalır. Məktəbin divarları dəyişə bilər, illər ötüb keçə bilər, zaman bir çox şeyləri unuda bilər. Lakin müəllimin şagirdinin qəlbində yandırdığı işıq heç vaxt sönmür. O işıq nəsildən-nəslə ötürülərək yaşayır, böyüyür və gələcəyi işıqlandırır.

Bir gün müəllim sinif otağından ayrılır, məktəbin həyətindən uzaqlaşır. Lakin onun səsi, öyrətdiyi dəyərlər, aşıladığı mənəviyyat yaşayır. Çünki müəllim əslində heç vaxt getmir. O, yetişdirdiyi insanların uğurlarında yaşayır, onların qazandığı hər zirvədə öz əməyinin izini görür.

Bu gün həyatımın ən böyük qazancına nəzər salarkən anlayıram ki, mənim sərvətim vəzifələrdə, titullarda və təltiflərdə deyil. Mənim ən böyük sərvətim şagirdlərimdir. Vətəninə, xalqına, ailəsinə layiq insan kimi yetişən hər bir gənc mənim ömrümün ən dəyərli mükafatıdır.

Əgər mənə yenidən seçim etmək imkanı verilsəydi, heç düşünmədən yenə müəllimlik yolunu seçərdim. Yenə məktəbə gələr, yenə uşaqların parlayan gözlərində gələcəyin işığını axtarar, yenə onların arzularına qanad verməyə çalışardım.

Çünki müəllim olmaq bir peşə deyil...

Müəllim olmaq bir ömürdür. Şagirdlərinin taleyində yaşayan, onların uğurlarında davam edən, zaman keçdikcə daha da ucalan bir ömür...

Zenfira Nusalova

225 nömrəli tam orta məktəbin direktor müavini

Türk Dünyası Araşdırmaları Beynəlxalq Elmlər Akademiyasının Fəxri Professoru

Türk Dünyası Onur Medalı Laureatı