Tarixi tapıntı: Motsartın gizli əlyazmaları aşkarlandı

Fransanın Milli Kitabxanasında (BnF) dahi bəstəkar Volfqanq Amadey Motsartın fleyta və arfa üçün yazdığı, indiyədək heç kimə məlum olmayan yeddi əsərinin əlyazması aşkar edilib.

YAZİCİ.AZ xəbər verir ki, bu barədə "BFMTV" kanalı məlumat yayıb.

Bildirilir ki, bu tarixi tapıntı Zalsburqdan olan mütəxəssislər tərəfindən də rəsmən təsdiqlənib. Əsrlər boyu gizli qalmış bu kompozisiyalar Musiqi Günündə ilk dəfə ictimaiyyət üçün səsləndiriləcək.

Hersoqun qızına verilən dərslərin yadigarı

Məlumata görə, 44 səhifədən və 12-yə yaxın kompozisiyadan ibarət olan bu nadir avtoqrafı (əlyazmanı) hələ fevral ayında kitabxananın musiqi şöbəsinin mühafizəçisi Fransua-Pyer Qua tapıb. Araşdırmalar nəticəsində məlum olub ki, qeydlər Motsartın 1778-ci ildə Parisdə hersoq de Qinin qızı Mari-Luiza-Filippina de Boner de Qinə verdiyi musiqi dərsləri zamanı edilib.

Fleyta və arfa üçün nəzərdə tutulan yeddi pyesdən sonuncusunun yarımçıq qaldığı bildirilir. Sənədin tam həqiqiliyi və Motsarta aid olması isə aprel ayında mütəxəssislər tərəfindən birdəfəlik təsdiqini tapıb.

Fransanın Milli Kitabxanasının (BnF) direktoru Jil Peku bu tapıntının əhəmiyyətini belə izah edib:

"Bu, mütəxəssislər tərəfindən birmənalı qəbul edilmiş çox mühüm bir kəşfdir. O, bizə pedaqoq Motsart haqqında daha çox məlumat əldə etməyə imkan verir və dahi bəstəkarın Parisdəki son səfərini rəsmi şəkildə sənədləşdirir".

Qapalı konsert və xüsusi nümayiş

Bazar günü qeyd olunacaq Musiqi Günündə bu nadir pyesləri ilk dəfə "Radio France" Filarmonik Orkestrinin solistləri – fleytaçı Matilda Kalderini və arfaçı Nikolya Tülye ifa edəcəklər. Lakin konsert qapalı formatda keçiriləcək və oraya giriş yalnız xüsusi dəvətnamələrlə mümkün olacaq.

Geniş auditoriya üçün isə konsertin səs yazısı bazar ertəsi "France Musique" radiosunda yayımlanacaq. Bundan əlavə, bayram şərəfinə kitabxana ziyarətçiləri həmin nadir əlyazmanın özünə canlı baxmaq imkanı əldə edəcəklər – sənəd xüsusi eksponat kimi nümayişə çıxarılacaq.(kulis.az)