Yağar qara yağışlar - Ələsgər Əlioğlunun şeirləri

Yazıçı Ədəbiyyat Portalı mərhum tanınmış şair Ələsgər Əlioğlunun şeirlərini təqdim edir.

QARA YAĞIŞ

Odla ki, oynayır bu qədər məmləkətlər,

Tüstülər qıvrıla-qıvrıla üzü göyə qalxar.

Xəritəyə düşməyən

İrili-xırdalı tüstü çayları,

Üzü yuxarı axar...

Axar bu tüstü çayları

Xəritəyə düşməyən

Nəhəng Tüstü okeanına...

Hopar bir ucdan

Yerə bərəkət gətirən

Buludların canına...

Buludlar da nəfəs alar

Ağır-ağır...

Hələ sinoptiklər bir yana,

Heç yağışların özləri də bilməz

Hara düşür,

Hara yağır...

Yağar qara yağışlar,

Qara günə qoyar təbiəti...

Əsrimiz qalar

Bu dünyaya yas tuta-tuta...

Qara yağışdan

Yer dönər özü boyda bir qara tabuta...

Olmaz üstündə bir ağlayanı da,

Bir saç yolanı da!..

Tapılmaz

Bir matəm marşı çalanı da!..

2024

QARIŞQA YUVALARI

Qarışqa yuvaları böyür-böyürə,

Qırtək qara-qara qarışqaların

Hərəsi öz iş-gücündə..,

Əmin-arxayınca yaşayırlar,

Dünyanın hər bir küncündə...

Allah yaratdığı

Bu qarışqalar

Başını aşağı salıb işləyir,

Gəlmir bir-biriylə kəllə-kəlləyə...

Biri yedəkləmir başqa birini,

Çəkmir fitnə-felə,

Çəkmir kələyə...

Hər biri də bilir öz iş-gücünü,

Qışı gözü altda alıb işləyir...

Bir baxın,

Biri apardığı dənə-

Burda başqasının nəfsi düşməyir...

Qarışqa yuvaları

Bu təbiətin

Həyat dərsliyidir bəşərə bəlkə...

Burda yuvaların hər biri də,

Bir məmləkət...

Bir ölkə...

Burda nə embarqo qoyulur,

Nə də nota verilir,

Yuvalar hərəsi də öz işindədir.

Hərəsi də öz yolunu-izini yaxşı bilir...

Kaş ki, qan axıdan prezidentlər,

Görə bu qarışqa yuvalarını...

Bir az dərs alalar bu təbiətdən,

Bir az dəyişələr havalarını...

25.10.2024

HAVA SAYĞACI

Heç bilmirəm nədəndir,

Gecələr də tapmıram bir dinclik.

Çox zaman

Alabəzək yuxulardan

Gəzirəm incik-incik...

Ancaq məni bərk qorxuzub,

Ötən gecəmin yuxusu.

Hələ də canımdadır

Onun qara qorxusu...

Xatırladıqca

İçərimi yandırır

Ötən gecəmin odu.

Yuxuda

Televizordan eşidirdim:

Fəaliyyətə başlamışdır,

Hava sayğacları zavodu...

Diktor davam edirdi

İstehzalı-istehzalı:

"Bu il ən yüksək həddə çatacaq,

Hava sayğacları istehsalı!...

Bu sayğaclar

İşıq, qaz, su sayğaclarından da

Keyfiyyətli olacaq.

Yəqin ki, sərgilərdə

"Yüksək keyfiyyət nişanı" da alacaq!..

...Xatırladıqca bunları,

Qısılıram özümə sarı...

Lənətləyirəm

Alabəzək yuxuları!..

15.01.2025

GÖYƏRÇİNLƏR

Havaya qalxın, uçun, uçun göyərçinlər,

Qanadlarınızı geniş açın göyərçinlər.

Alnınıza SÜLH yazılıb,

Bilir bunu bütün bəşər;

Gəlib qarşı-qarşıya dayanıb

Bu gün Xeyirlə Şər...

Uçun!.. Uçun!..

Bir dəstəniz qonsun

Kremlin divarlarına,

Bir dəstəniz də

Ağ evin dəmir barmaqlıqlarına...

Qanadlarınızı yelləyə-yelləyə

Elçi düşün sülhdən ötrü.

(Bir az da qanadlı olun,-

Ləngiməyin vaxt ötürüb!..)

Hardan alım indi axı Pikassonu,

Əlində fırça

Meydana atıla.

Bu dünyamızda

Sizin sayınızı bir az da artıra!..

Havaya qalxın, uçun, uçun göyərçinlər,

Qanadlarınızı geniş açın göyərçinlər!..

15.10.2024

31 DEKABR

31 dekabr-

Ömrümüzdən gəlib keçən qatarların

Son dayanacağı...

Şüurumuza həkk olunan,

Yeni-yeni baxış bucağı...

Bu qatardan düşüb,

Minirik o qatara...

Yol gedirik gündüz-gecə,

Dolanırıq zamanın orbitində;

Saatların əqrəbindən keçə-keçə...

Hər qatarı dəyişdikcə,

Qara günə -

Ağ günə öyrəşir üzümüz.

Hər qatarı dəyişdikcə,

Daha rahat kupe gəzir gözümüz..

Hər qatarı dəyişdikcə

Həvəs artır yaşamağa...

Arabir bələdçinin eşidilir səsi :

Diqqət, diqqət!

Sərnişinlər,

Qatar yaxınlaşır Torpağa...

30.12.2024